‘मलाई शेरबहादुर देउवा मन पर्छ किनभने...’ शीर्षकमा देउवाकै सचिवालयले बनाएको भिडिओका कारण उनी आलोचित हुन थालिसकेका थिए। बिहीबार साँझ कांग्रेस महामन्त्री पूर्णबहादुर खड्का र प्रवक्ता विश्वप्रकाश शर्माले पनि त्यसको विरोध जनाउँदै सामाजिक सञ्जालमा लेखे र ‘त्यो हदको गाईजात्रा नगर्न’ सुझाव दिए।
देउवाका ‘भित्रिया’मध्येका यी दुई नेताले त्यो गलत कार्यको विरोध गर्न सामाजिक सञ्जालकै सहारा लिनुपरेपछि बिहीबार साँझैदेखि गाइँगुईँ चल्न थाल्यो- बालुवाटारमा फेरि के हुँदैछ? 'ओली युग'को प्रतिस्थापन गरेर देउवा बालुवाटार छिरेको महिना दिन हुनै लाग्दा गाइँगुईँ यो पनि चल्न थालेको छ– गठबन्धन सरकारका प्रधानमन्त्री देउवालाई दु:खै दु:ख छ।
किनभने उनले महिना दिनसम्म मन्त्रिपरिषद् विस्तार गर्नसकेका छैनन्, पार्टीमा आफ्नै गुटभित्रका उपगुट व्यवस्थापन गर्न कठिन भइरहेको छ। अर्कै गुटको पिरलो त छ नै साथमा गठबन्धनको अलमल पनि।
विश्लेषक लोकराज बराल प्रधानमन्त्रीका रूपमा देउवाको अहिलेको समय निक्कै अप्ठ्यारोमा चलिरहेको बताउँछन्।
‘दु:ख छ नि देउवाजीलाई’, बरालले भने, ‘देउवा यतिबेला प्रधानमन्त्री हुनु भनेको भालुको कम्पट हो भन्ने थाहै थियो। बाध्यतावश ओलीलाई विस्थापन गर्न आएका हुन्। तर बिचरा उनको पार्टनर पनि त्यस्तै छन्।’
सरसर्ती हेर्दा अहिले देउवाका तीन दु:ख देखिन्छन्। तीनै दु:खकाे व्यवस्थापन अहिले उनकाे चुनाैती पनि हाे।
