चुनावी घोषणापत्रमै सीमित भयो काठमाडौँको रेल
काठमाडौँ उपत्यकामा रेल कहिले गुड्छ ? काठमाडौँ महानगरपालिकाका प्रमुख विद्यासुन्दर शाक्यलाई तीन वर्ष अघिसम्म यो प्रश्न निकै प्यारो लाग्थ्यो । तर, अहिले यसैले उनलाई गिज्याउन थालेको छ ।
काठमाडौँमा आफ्नै कार्यकालमा मेट्रोरेल, मोनोरेल सञ्चालन गर्ने, स्मार्ट सिटी बनाउने लगायतका घोषणा गरेर विद्यासुन्दर शाक्य चार वर्षअघि काठमाडौँको मेयरमा विजयी भएका हुन् ।
आगामी फागुनमा कार्यकाल सकिँदासम्म रेल गुड्ने त परै जाओस्, यसको विस्तृत सम्भाव्यता अध्ययन प्रतिवेदनसम्म तयार हुने सम्भावना न्यून छ । मोनोरेल सञ्चालनबारे विगत दुई वर्षदेखि काठमाडौँ महानगरपालिकाको नीति तथा कार्यक्रम मौन रहनुले यस्तै सङ्केत गर्छ ।
के भनेका थिए विद्यासुन्दरले ?
२०७४ सालको चुनावमा विद्यासुन्दर शाक्यले आफूलाई चुनाव जिताएमा ३ वर्षभित्र चक्रपथभित्र मोनो रेल सञ्चालन गर्ने बताएका थिए । चुनाव जित्नेवित्तिकै डीपीआर तयार पार्ने र दुई वर्षभित्रै मेट्रो रेल सञ्चालन गर्ने शाक्यले आश्वासन दिएका थिए ।
त्यसबेला शाक्यले भनेका थिए– यो असम्भव छैन, गरेर देखाउँछौँ, नत्र महानगरबासीले ५ वर्षपछि हामीलाई दण्डित गरे हुन्छ ।
चुनावका बेला शाक्यले काठमाडौँमा दिनको २० घण्टा सार्वजनिक यातायातका रूपमा सिटी बस सेवा सञ्चालन गर्ने बताएका थिए । कुनै पनि स्थानबाट ५ मिनेटभन्दा बढी हिँड्न नपर्ने गरी सार्वजनिक यातायातको व्यवस्था गर्ने भन्दै उनले भोट मागेका थिए ।
