प्रधानमन्त्री शेरबहादुर देउवाले आफ्नो कार्यकालको पहिलो प्राथमिकता खोप हुने बताए पनि व्यवस्थित सरकार सञ्चालनका लागि साझा नीति र कार्यक्रम सरकारले ल्याउनुपर्ने एक राजनीतिशास्त्रीले बताएका छन्।
प्रधानमन्त्रीको दलका अर्का एक नेताले खोप खरिदबाहेक व्यवस्थित परराष्ट्रनीति तथा सत्तामा हुने राजनीतिकीकरण नियन्त्रण सरकारको उच्च प्राथमिकतामा पर्ने बीबीसीलाई बताएका छन्।
सर्वत्र चासोपूर्वक हेरिएको स्वास्थ्यमन्त्री नियुक्तिसहित मन्त्रिपरिषद्को पूर्णताबारे पनि देउवाले आफूलाई समर्थन गरेका अन्य दलसँग छलफल गर्ने उनले बताए।
प्रधानमन्त्री देउवाले नेकपा माओवादी केन्द्र, जनता समाजवादी पार्टी र एमालेको असन्तुष्ट पक्षसहितको मतबाट आइतवार विश्वासको मत प्राप्त गरेका थिए।
विश्वासको मत लिने क्रममा प्रधानमन्त्री देउवाले आफ्नो सरकारको पहिलो प्राथमिकता कोभिड-१९ को महामारीबाट नागरिकलाई जोगाउनु भएको बताएका थिए।
उनले भने, "अहिलेको पहिलो प्राथमिकता खोप, दोस्रो प्राथमिकता खोप र तेस्रो प्राथमिकता खोप। तीनवटा प्राथमिकता खोप, खोप, खोप। जिन्दगी बचाउनु सबैभन्दा ठूलो कुरा हो। हाम्रो प्राथमिकता भनेको खोपबाहेक अरू केही छैन।"
