नेकपा एमालेको विवाद समाधान गर्न गठित कार्यदल सदस्यहरूले विवाद समाधान उन्मुख भएको दाबी गरेका छन् । यद्यपि कार्यदलभित्र दुई महत्त्वपूर्ण विषयमा सहमति जुट्न भने बाँकी नै रहेको छ ।
एमाले नेताहरूका अनुसार अध्यक्ष केपी शर्मा ओलीले गरेको संसद् विघटन र माधव नेपाल समूहले अदालतमा बुझाएको हस्ताक्षरबारे मौन रहँदै सहमति खोज्ने प्रयासको थालनी भएको छ । तर सहमतिको भाषा फेला परिसकेको छैन ।
कार्यदलका एक सदस्यका अनुसार एमाले केन्द्रीय कमिटीको सङ्ख्या र माओवादीबाट एमाले आएका नेताहरूको व्यवस्थापनमा समस्या छैन । यसअघि एमालेको केन्द्रीय कमिटी २४१ मान्ने कि २६४ भन्नेमा विवाद थियो ।
