कौशल काफ्ले
कोरोना महामारीका कारण धेरै जना घरैमा थुनिएको समयमा स्वास्थ्यकर्मी, सफाईकर्मी, सुरक्षाकर्मी, सञ्चारकर्मीलगायत अग्रपङ्क्तिमा खटिनुपर्ने पेशा व्यवसायमा संलग्न भएकाहरूभने कोरोनाविरुद्धको लडाइँमा मैदानमा थिए र छन् ।
पहिलो लहरको महामारीमा त हाम्रा स्वास्थ्यकर्मीसँग, मास्क, व्यक्तिगत सुरक्षा उपकरण (पीपीई) समेत थिएन । अक्सिजन र बेडको हाहाकार भइरहँदा स्वास्थ्यकर्मीले आफू बस्ने, बेञ्च तथा कुर्सीमासमेत संक्रमित राखेर उपचार गरे । दिनरात, भोक तिर्खा नभनी युद्धस्तरमा महामारीको सामना गरे ।
तिनै 'फ्रन्टलाइनर'को सम्मानमा चित्रकार दुजाङ शेर्पाले राजधानीको रत्नपार्क स्थित आकाशे पुलको भित्तामा एक चित्र बनाए । महामारीको समयमा खुल्लामञ्चमा भोकाहरूलाई मनकारीले भात खुवाउँदा लाज भयो भन्ने काठमाडौं महानगरले त्यो चित्र मेट्यो ।
फ्रन्टलाइनरलाई दिन्छु भनेर कबोल गरेको भत्ता दिन नसक्ने सरकारलाई कलाकारले आफ्नो तहबाट उनीहरूको सम्मानमा बनाएको चित्र पनि असह्य भयो ।
कोरोनाले संसार थलिँदा फ्रन्टलाइनरका नाममा यसरी सडकका भित्तामा चित्र यहाँ मात्र कोरिएनन् । केन्या, फ्रान्स, इन्डोनेसिया, सेनेगल लगायतका धेरै देशमा महामारीका दौरान कलाकारले सडक र सडकका भित्तामा यस्ता चित्र बनाए । सेनेगलका मेयरले त चित्र बनाएर धेरै मानिसम्म कोरोना महामारीको सन्देश पुर्याएको भन्दै कलाकारको सम्मान नै गरे ।