सडक निर्माण सुरु भएको ३० महिनामा जम्मा १६ प्रतिशत भौतिक प्रगति, भारतीय ठेकेदार कम्पनीले सुन्दैन नेपाली पक्षको कुरा
पाँचथरको राँके निवासी रवि नेम्वाङलाई घर अगाडिको राँके–रवि–भेँडेटार जोड्ने सडकले चाँडै काँचुली फेर्ने विश्वास थियो । किनकि प्रधानमन्त्री केपी शर्मा ओली स्वयं राँकेमा आएर सडक कालोपत्रेको शिलान्यास गरेका थिए ।
तर ३६ महिनामा निर्माण सम्पन्न गर्ने गरी प्रधानमन्त्रीले तामझामका साथ शिलान्यास गरेको ३० महिना बितिसक्दा सडकको अवस्था झन् हिँडिनसक्नु बनेको छ । भारतीय निर्माण कम्पनीले चरम लापरबाही गर्दा स्थानीयवासीले सास्ती व्यहोर्नुपरेको हो ।
‘घर अगाडिको सडक खाल्डैखाल्डाका कारण पानी जमेर हिँडिसक्नु छैन,’ नेम्वाङ भन्छन्, ‘छिमेकीको घर जान पनि बारीको घुमाउरो बाटो प्रयोग गर्नुपर्ने अवस्था छ । सडकको अवस्था हेर्दा कालोपत्रे गर्नका लागि नभई धान रोप्न ठिक पारिएको खेतजस्तो लाग्ने उनी बताउँछन् ।
उनीमात्र होइन, सडकको दुरावस्थाका कारण सो क्षेत्रका स्थानीयले सास्ती पाएका छन् । बर्खा लागेसँगै पानी जमेर सडक नै पोखरीजस्तै भएकाले सवारी साधन सञ्चालनमा समेत कठिनाइ भएको छ ।
पूर्वी पहाडी जिल्ला पाँचथरको राँकेदेखि धनकुटाको भेँडेटार जोड्ने सडक निर्माण भएको दुई दशकपछि कालोपत्रे गर्ने योजनासहित प्रधानमन्त्री ओलीले २०७५ पुसमा शिलान्यास गरेका थिए ।
तर भारतीय ठेकेदारको चरम लापरबाहीका कारण ठाउँठाउँमा खाडल बनाएर छाडिएको छ भने अविरल वर्षाले कतै हिलाम्मे र कतै पोखरीजस्तो भएको छ ।
