नेपालमा कोरोना सङ्क्रमणको दोस्रो लहर कायम छ । सङ्क्रमितको ग्राफ ओरालो लाग्ने क्रममा रहे पनि भविष्यमा सङ्क्रमणको तेस्रो लहर आउने भन्दै स्वास्थ्य तथा जनसङ्ख्या मन्त्रालय र जनस्वास्थ्यविद्हरुले सचेत गराइरहेका छन् ।
सङ्क्रमणको तेस्रो लहरमा बालबालिका बढी प्रभावित हुने जनस्वास्थ्यविद्हरुले सङ्केत गरेका छन् । नेपालमा शिशु जन्मेदेखि १५ महिनाको अवधिमा विभिन्न प्रकारका १२ वटा खोप अनिवार्य रूपमा लगाउनुपर्छ । तर कोरोना सङ्क्रमणको दोस्रो लहर कायम रहँदा त्रासले शिशुहरुलाई नियमित खोप दिन अभिभावकहरु हिचकिचाएको अवस्था छ ।
१५ महिनाभन्दा कम उमेर समूहका बच्चालाई कोभिड–१९ पुष्टि हुँदा बीसीजी, डीपीटी—हेपबी—हिब, पोलियो, पीसीभी, रोटा, जेई, दादुरा, रुबेला जस्ता नियमित खोप दिन हुन्छ कि हुँदैन भनेर अभिभावक अन्योलमा परेको पाइन्छ । यस्तो अवस्थामा शिशुलाई यी खोप लगाइदिन हुन्छ कि हुँदैन ? कोरोनाको त्रासमा बच्चालाई नियमित खोप नदिएको खण्डमा स्वास्थ्यका कस्ता समस्या आउँछन् ? कोरोनाविरुद्धको पहिलो मात्रा खोप लगाएका अन्य उमेर समूहका नागरिकले दोस्रो मात्रा कस्तो अवस्थामा लगाउन हुँदैन भन्नेबारे आमचासो छ ।
