कोरोनाभाइरस रोकथाम तथा नियन्त्रणका लागि देशभरि प्रतिबन्धात्मक कदमहरू जारी रहँदा अहिले पनि औसतमा दैनिक आठ हजार सङ्क्रमित थपिने गरेको तथ्याङ्कले देखाउँछ।
स्वास्थ्य तथा जनसङ्ख्या मन्त्रालयका अनुसार पछिल्लो समय कोभिड-१९ सँग सम्बन्धित कारणले दैनिक औसतमा १५० देखि २०० जनासम्मको मृत्यु हुने गरेको छ।
मङ्गलवारसम्म नेपालभरि एक लाख १७ हजार जनामा सक्रिय सङ्क्रमण पुष्टि भएको मन्त्रालयले जनाएको छ।
तीमध्ये एक लाख आठ हजार घरमै र ८,८३३ जना संस्थागत आइसोलेशनमा रहेका छन्।
स्वास्थ्य मन्त्रालयका अनुसार नेपालमा हाल फैलिएका तीनवटा भेरिअन्टमध्ये बी.१.६१७.२ भेरिअन्ट मुख्य रूपमा फैलिएको छ।
तुलनात्मक रूपमा बढी सङ्क्रामक देखिएको उक्त भेरिअन्ट गत वर्ष भारतमा सबैभन्दा पहिला पुष्टि भएको थियो।
मानिसहरूको आवतजावत प्रभावकारी रूपमा नियन्त्रण नहुँदा र कतिपय सेवा तथा कार्यले निरन्तरता पाइरहँदा सङ्क्रमण दर अपेक्षाकृत रूपमा कम हुन नसकेको स्वास्थ्यमन्त्री हृदयेश त्रिपाठीले सोमवार गुनासो गरेका थिए।
उनका अनुसार आगामी चार सातामा सङ्क्रमण दर क्रमिक रूपमा घट्दै जान सक्ने सरकारको प्रक्षेपण छ।
