धनुषामा ट्रकको ठक्करबाट नेपाल प्रहरीका एक जना असईको घटनास्थलमै मृत्यु भएको छ।
ढल्केवर–बर्दिबास सडकखड अन्तर्गत मिथिला नगरपालिका वडा नम्बर १० लालगढस्थित मोडेल अस्पतालदेखि पश्चिम राजमार्गमा असई सवार रहेको मोटरसाइकलमा ट्रकले ठक्कर दिँदा उनको घटनास्थलमै मृत्यु भएको प्रहरीले जनाएको छ।
ट्रकको ठक्करबाट असई मदनजंग कापरको मृत्यु भएको हाे। उनी प्रदेश २ को मुख्यमन्त्री तथा मन्त्री परिषदको कार्यालयमा कार्यरत रहेको बुझिएको छ।
शुक्रबार बिहान करिब ३ बजे असई कापरको शव भेटिएको थियो।
शव शंकास्पद देखिएपछि खोजतालस गर्दै जाँदा जनकपुरबाट बर्दिवासतर्फ जाँदै गरेको असई चढेको लु ५३ प ८५७५ नम्बरको मोटरसाइकललाई विपरित दिशाबाट आइरहेको स ८ प ३९३६ नम्बरको ट्रकले ठक्कर दिएको खुलेको इलाका प्रहरी कार्यालय ढल्केवरका प्रहरी निरिक्षक तिर्थ कार्कीले जनाए।
ठक्कर दिई तत्काल घटनास्थलबाट फरार भएका ट्रकलाई सुनसरीको इनरुवा प्रहरीले नियन्त्रणमा लिएर अनुसन्धान प्रकृयालाई अगाडि बढाइएको छ।
मृतक असइ महोत्तरीको बलवा नगरपालिका धमौरा निवासी रहेको बुझिएको छ। उनको शव पोष्टमार्टमका लागि प्रादेशिक अस्पताल जनकपुरमा राखिएको छ।
घटनाबारे थप अनुसन्धान भइरहेको प्रहरी प्रनि कार्कीले जनाए।
