अभिको होस केही समय पछिमात्र खुल्यो। आँखा खुल्दा अस्पतालको शैय्यामा थिए उनी - अर्धहोसमा। डोल्पा पुगेका उनी एकाएक क्षेत्रीय अस्पताल सुर्खेतमा भएको थाहा पाउँदा छक्क परे। झसङ्ग त तब भए जब डाक्टर बोलेको सुने - 'अस्पताल ल्याउन केही समयमात्र ढिलो भएको भए ज्यान जान सक्थ्यो।'
अभिलाई लाग्यो - 'दोस्रो जन्म भयो। अब सायद हत्तपत्त मर्दिनँ।'
उनका मानसपटलमा भने केही दिनअघिका दृश्य 'रिक्याप' भइरहेका थिए। तर, पूरा घटना सम्झन सकिरहेका थिएनन्। किनकि यतिन्जेल उनको अवस्थामा सुधार भएको थिएन। क्षेत्रीय अस्पताल सुर्खेतमा उपचारका लागि आवश्यक केही उपकरण र औषधी अपुग भयो। त्यसपछि परिवारले अभिलाई उपचारका लागि काठमाडौं ल्यायो।
बाँच्नका लागि गरेको त्यो यात्रा पनि कहाली लाग्दो रह्यो। अक्सिजन सिलिन्डरको सहायतामा काठमाडौं ल्याइयो र सुरु भयो उपचार।
