नेपाली कांग्रेसका केन्द्रीय सदस्य रमेश लेखक सभापति शेरबहादुर देउवा निकट मानिन्छन्। पछिल्लो राजनीतिक घटनाक्रममा उनी सभापति देउवासँगै प्रत्यक्ष संलग्न पनि छन्। पछिल्लो समय देउवासँग विभिन्न दलका नेताहरुले गरेको राजनीतिक भेटघाट भेटघाटमा लेखक देउवासँगै हुन्छन्। राजनीति अन्यौलग्रस्त छ। सर्वोच्चको फैसलाबाट ६४ प्रतिशत बहुमत प्राप्त दल नेकपा पुरानै स्थिति (एमाले र माओवादी)मा फर्किएको छ।
नैतिक रुपमा प्रधानमन्त्री केपी शर्मा ओली अल्पमतमा परिसकेका छन्। सत्ताको नयाँ समीकरण निर्माणका लागि प्रमुख प्रतिपक्षी नेपाली कांग्रेस पनि निर्णायक भूमिकामा छ। दलहरु सत्ता सहकार्य प्रस्ताव ल्याएर सानेपा र बुढानीलकण्ठ धाइरहेका छन्। तर कांग्रेस भने अझै 'पर्ख र हेर'को रणनीतिमा छ। कुनै ठोस निर्णयमा पुगिसकेको छैन। कांग्रेस किन निर्णयमा पुग्न सकिरहेको छैन? सत्ता सहकार्यको रणनीति के हो? पछिल्लो राजनीतिक अन्यौलतालाई निकास दिन कांग्रेसको भूमिका के हुन्छ भनेर नेता लेखकसँग सोधेका छौं :
वर्तमान राजनीतिक परिस्थितिमा कांग्रेसका भूमिका कस्तो रहन्छ? के गर्दैछ कांग्रेस?
पहिलो त नेपाल कम्युनिस्ट पार्टीको सरकारले प्रतिनिधिसभा विघटन गरेपछि हामीले असंवैधानिक र अलोकतान्त्रिक भनेर आन्दोलन गर्यौं। वैधानिकता जाँच्ने सर्वोच्च अदालतले जे निर्णय गर्छ मान्छौं भनेका थियौं। पुनर्स्थापना भयो। स्वीकार गर्यौं। र हामी प्रतिनिधिसभाभित्र गएका छौं। प्रतिनिधिसभाभित्र हामीले गर्ने भूमिकामा अहिले थोरै परिवर्तन आएको छ। पहिले नेकपाको सरकार थियो। हामी प्रमुख प्रतिपक्षी थियौं। तदअनुरुप भूमिका गरिराखेका थियौं। तर अब प्रतिनिधिसभाको स्वरुप परिवर्तन भएको छ। एउटा कुनै पार्टी स्पष्ट र दुई तिहाइ बहुमत नजिक भएको अवस्था अहिले त्रिशंकु प्रतिनिधिसभामा कसैको पनि बहुमत नभएको जस्तो स्थितिमा रुपान्तरित भएको छ। हाम्रो भूमिका पहिलेभन्दा थोरै कमजोर भएर पनि गएको छ। त्यसकारण सरकार बनाउने, गठन वा परिवर्तनको कुरा हाम्रो हातमा मात्रै छैन। प्रतिनिधिसभामा अगामी दिनमा घटनाक्रमहरु जसरी विकसित हुन्छन् हामी त्यसैअनुरुप अगाडि बढ्छौं।
