महाशिवरात्रिका अवसरमा आज बिहानैदेखि पशुपतिनाथ मन्दिरमा लाखौँ भक्तजनको भीड लागेको छ।

भगवान शिवको पूजा–आरधना गर्न नेपाल र भारतका विभिन्न स्थानबाट भक्तजनहरु पुशपतिमा आएका छन्। महाशिवरात्रिका लागि पशुपतिनाथ मूल मन्दिरका चारै ढोका बिहान ४ बजेदेखि नै खुला गरिएको थियो।

कोरोना महामारीको कारण विगतमा भन्दा कम भक्तजनहरुको उपस्थिति रहेको पशुपति क्षेत्र विकास कोषले जनाएको छ।

शिवले अवतार लिएको रातलाई नै शिवरात्रि भन्ने गरिएको विश्वास गरिन्छ। आज द्वादश ज्योतिर्लिङ्गको पनि शिर मानिने काठमाण्डौंको पशुपतिनाथसहित देशभरका शिवालयमा कोरोना कहरका बीचमै दर्शनार्थीको भीड देखिन्छ।

फागुन कृष्ण चतुर्दशीका दिन मनाइने यस पर्वलाई सम्पूर्ण दीनदुःखी र कष्टपूर्ण अवस्थामा रहेका प्राणीको हृदयमा धर्मको उदय गराउने आशुतोष भगवान् शिवको अतिप्यारो दिनका रूपमा पनि लिइन्छ।