रकस्टार कर्ट कोबेनको मृत्युपछि उनकी आमाले भनेकी थिइन्, ‘कोबेन बुढो आत्मा भएका जवान व्यक्ति थिए ।’ तर हामीलाई यो कुरा सुनाउने व्यक्ति ‘जवान आत्मा भएका एक ज्येष्ठ नागरिक’ हुन् । त्यसैले त जीवनको ७० वर्ष पुग्नै लाग्दा पनि उनी जोसिला, रसिला, हँसिला र मिजासिला छन् । उनको अक्कल, आँट र जाँगर प्रशंसनीय छ । उनको लवाई, बोलाई र हिँडाई हेर्दा उनको वास्तविक उमेर सायदै कसैले सटिक रुपमा भन्न सक्ला । गोलो आकारको गगल्स, अघिल्तिर छोटो पारेर ठाडो पारिएका र पछिल्तिर पालेको लामो कपाल उनका पहिचान हुन् ।    

हुन त उनीे चकाचौंधले भरिपूर्ण साङ्गीतिक क्षेत्रमा सक्रिय छन् । उनी ग्ल्यामर, स्टाइल, लाइट, क्यामेरा, दर्शकजस्ता कुरासँग परिचित, अभ्यस्त र सहज छन् र त यति टाढासम्म आइपुगेका छन्, ‘लिभिङ लेजेन्ड’ को रुपमा आफूलाई स्थापित गराउन सफल भएका छन् ।

उनको काम यदि नेपाली साङ्गीतिक क्षेत्रमा नभएको भए सायद नेपालमा नाइन्टिजको रक भन्ने नै हुँदैनथ्यो होला, रक एण्ड रोल सङ्गीतले नेपालमा अहिले जति फड्को मारेको छ, सायद यो यति टाढासम्म आइपुग्दैनथ्यो होला । उनले जे जति गरे त्यसले रक सङ्गीतमा लाग्ने पछिल्ला पुस्तालाई मार्ग प्रशस्त गरिदियो, सहज बनाइदियो ।