सुगा रङको धोती। हरियोमा बुट्टे बर्को टाउकोदेखि गमलङ्ग ओढेकी थिइन् वागमतीदेवी माझीले। बर्कोमा 'प्राइस ट्याग' प्रष्टै देखिन्थ्यो ।
काठमाडौं जाने भनेर मङ्गलवारमात्र टुङ्गो लाग्यो। बुधवार नै बिरुवा बजार पुगेर किनेकी हुन्, त्यो बर्को।
हिजो साँझ उनीहरू चढेको गाडी राजधानीका लागि हिँड्यो।
शहरको रमझमबारे सुनेकी वागमती दङ्ग थिइन्। तर, उनलाई काठमाडौं आउनुको उद्देश्य चाहिँ थाहा रहेनछ। बस् यति भनिएको थियो – प्रधानमन्त्रीको भाषण हुन्छ। सुन्ने अनि ताली बजाउने।
सोचेकी थिइन् – प्रधानमन्त्रीसँग भेट हुन्छ। त्यहाँ आफ्नो 'हक' माग्ने योजनामा थिइन्। तर, केपी ओली त अग्लो मञ्चमा उभिएका थिए।
वागमतीहरू उभिएको ठाउँबाट उनलाई देख्न समेत हम्मेहम्मे। कहाँबाट माग्नु हक? भिडको ठेलम्ठेलले गाह्रो बनाएपछि सडकको छेउमा आइन् र सोधिन् - 'प्रधानमन्त्री त केपी ओली हो, सरकार चाहिँ को हो?'
