कुवेर गिरी
छुट्नलाई पो रैछ क्यारे सानु
तिम्रो मेरो यति धेरै माया बसेको
यतिबेला यो गीत सबैको मुखमा झुन्डिन सफल भएको छ । सामाजिक सञ्जाल, टिकटकदेखि सबैतिर यही गीतको चर्चा छ । क्लासिकल अलापबाट उठान गरेर गजल शैलीमा तयार यो गीत जतिले सुनेका छन्, ती सबैले ‘नेपाली संगीतमै एउटा फरक प्रयोग’ भनेका छन् ।
दसैँको छेको पारेर सार्वजनिक भएको यो गीतको पछिल्लो समय श्रोता तथा दर्शक बढ्दो छ । गायक तथा संगीतकार थानेश्वर गौतम यो गीतको लोकप्रियताले निकै उत्साहित भएका छन् । ‘प्रेमी÷प्रेमिकालगायत जो आफ्नोसँग बिछोडिएका छन्, ती सबै यो गीत सुनेर आफन्त सम्झदै रोएको पाइयो,’ गौतमले भने, ‘गीतको प्रतिक्रिया एकदमै राम्रो छ । दर्शकले यो गीतमा दिएको प्रतिक्रिया लाखौं÷करोडौं गीतहरुमा एउटाले मात्र पाउँछ ।’
कतिपय गीत धेरै चल्ने, भाइरल हुने, रातारात युट्युवमा करोडौं
भ्युज हुने गर्दछन् । तर, त्यस्ता गीतले समेत यो गीतको जस्तो सकारात्मक प्रतिक्रिया पाउन नसक्ने उनी सुनाउँछन् । भन्छन्, ‘संगीतप्रेमीको मन यसले बास्तवमै जित्न सफल भएको छ ।’
कलाकार सबै रोए
प्रभा बर्तौलाको शब्द रहेको गीतमा थानेश्वर आफैले संगीत दिएका हुन् । गीत कम्पोज गर्दा उनी आफै पनि रोएका थिए रे । गीतमा उनलाई गायिका शान्तीश्रीले स्वरमा साथ दिएकी छन् । ‘गीत गाउदा गायिका धेरै रुनु भयो,’ गौतमले भने, ‘गायिका रुँदा रेकर्डमा समेत केही समस्या भएको थियो ।’
