बीपीको नेतृत्वमा सरकार बनेदेखि नै राजा महेन्द्र प्रजातन्त्र चल्न दिन चाहँदैनथे । अनेक घटनाहरु घटाए, उनकै निर्देशनमा । देशका विभिन्न स्थानमा दरबारको इसारामा प्रदर्शन भयो । पश्चिम एक नम्बर नुवाकोट, गोरखा, बझाङलगायतका ठाउँमा प्रदर्शन गराइयो । केही मान्छे मरे पनि ।
पुस १ गते तरुण दलको अधिवेशन थियो । बीपीले उद्घाटन गर्ने कार्यक्रम भएकाले त्यहाँ ठूलै चहलपहल थियो । म त्यसबेला फुच्चे थिएँ । हामी भोलेन्टियरका पनि भोलेन्टिएर भएर थापाथलीको सम्मेलनमा सहभागी थियौँ । त्यहाँ सबै नेताहरु हुनुहुन्थ्यो । त्यही बेला सेनाका जर्नेलहरु आए, त्यहीँबाट प्रथम जननिर्वाचित बीपीसँगै गणेशमान सिंह, किशुनजी, भद्रकाली मिश्र, रामनारायण मिश्र, योगेन्द्रमान शेरचन, देवानसिंह राई, सूर्यप्रसाद उपाध्यायलगायतका सबै मन्त्रीहरु र त्यहाँका प्रमुख नेताहरु पक्राउ परे ।
