लेकसाइडको बाराहीघाटमा पानी बेच्न बसेकी पदममाया आले कात्तिक २० गते दिउँसो अचानक भागदौड गर्न थालिन्।
फेवाताल हेर्न आउने पर्यटकलाई बेच्न राखेको पानीलगायत पेय पदार्थ र अन्य सामग्री हतार–हतार लुकाइन् र आफू पनि लुकिन्।
उनलाई यो सब काम गर्न सघाउँदै थिइन्- ११ वर्षीया खुशी पुलामी मगर।
कक्षा ५ मा पढ्ने खुशीको स्कुल कोरोनाले खुलेको छैन, आमालाई दिनहुँ पानी बेच्न सघाइरहेकी छिन्।
पानीको बोतल लुकाउन र आफू लुक्न खुशीले पनि अहिले जानिसकेकी छिन्।
उनीहरूको भागदौड मच्चिनुका कारण क्षणभरमै खुल्यो, जब नगर प्रहरी लेकसाइडमा डुल्न आए।
