शल्यक्रिया गर्न आवश्यक पर्ने सर्जन गाउन, ड्रेपलगायत कपडा पर्याप्त उपलब्ध नभएको भन्दै वीपी कोइराला स्वास्थ्य विज्ञान प्रतिष्ठान धरानको गाइनो विभागले गर्भवतीहरुलाई भर्ना लिन बन्द गरेको छ। हिजो साँझदेखि विभागले गाइनो वार्डमा नयाँ गर्भवती महिलालाई भर्ना लिन बन्द गरेको हो।
विभागले भर्ना नलिएपछि आज बिहानैदेखि गाइनो इमर्जेन्सी पुगेका गर्भवतीहरु विचल्ली भएर फर्किरहेका छन्। कतिपयलाई परिवारले अन्यत्र अस्पताल तिर लिएर गएका छन्। डाक्टरले नै आज बिहान ८ बजे गर्भवती बुहारीलाई गाइनो इमर्जेन्सीमा लिएर आउन भनेर लगेपनि आज भने भर्ना लिन नमानेको धरानका देवहांग राईले बताए। ‘हिजो डाक्टरले नै आज बिहान ८ बजे खाना नखाई आउनु भनेको थियो, हामीले त्यसै गरेर बुहारी लिएर गयौं। तर, आज त कसैलाई पनि भर्ना लिन मानेको थिएन,’उनले भने,‘बिहान त निक्कैबेर तनाव भयो।’
