जिल्ला प्रहरी कार्यालय मोरङले ठूलो मात्रामा विष्फोटक पदार्थसहित नेत्र विक्रम चन्द ‘विप्लव’ समूहका कम्पनी कमिश्नरलाई पक्राउ गरेको छ।
विप्लवका पूर्वी कमाण्डका कम्पनी चुलाचुली गाँउपालिका ६ का कमिश्नर १८ वर्षीय विज्ञान राई समन, र सप्तरीको सुरुंगा नगरपालिका २ का
काशीनाथ घिमिरे प्रतिकलाई बुधबार पक्राउ गरेको मोरङका प्रहरी प्रमुख प्रहरी उपरीक्षक सन्तोष खड्काले जानकारी दिए।
पक्राउ परेका घिमिरे विप्लव समूहको पूर्वी कमाण्ड मेची कोशी ब्यूरो चौथो कम्पनी कमिश्नर र राई पार्टी सदस्य हुन्।
घिमिरे सप्तरी जिल्लाको पूर्व सेक्रेटरी समेत रहिसकेको प्रहरीको दावी छ।
विशेष सुराकीका आधारमा स्थानीयसंग चन्दा रकम असुल गर्दै गर्दा मिक्लाजुंग गाँउपालिकाबाट १ घुर्मिसेस्थित विजुलीप्रसाद तिम्सिनाको घरबाट पक्राउ गरिएको हो।
दुवैजनाको साथबाट हातहतियार खरखजाना, विष्फोटक पदार्थ, चन्द समूहको दस्तावेजका सामग्री समेत फेला परेको प्रहरीको भनाइ छ।
प्रहरीले उनीहरुको साथबाट १ थान नालसहित भरुवा बन्दुक, त्यसमा प्रयोग हुने १ बट्टा फलामको टुक्रा, विष्फोटक पदार्थ जिलेटिन ३ किलोग्राम, सुतली बम २ थान, सकेट बम १ थान, टुकी बम १ थान, इलेक्ट्रिक डेटोनेटर ३५ थान, नन इलेक्ट्रिक डेटोनेटर १८ थान, लाईटर ६ थान, १२ भोल्टको ब्याट्री १ थान र गन पाउडर र बारुद ४ बट्टा बरामद गरेको छ।
१५ हजार रुपैयाँसहित प्रहरीले सेफ्टी फ्युज तार ३८ मिटर, बिजुलीको तार ९० मिटर, १० थान मोबाइल, खुकुरी ४ थान, दाउ १ थान, नेपाल टेलिकमको ७ वटा र एनसेलको २ वटा सिमकार्ड फेला पारेको छ।
