प्रेम रावत ।
हिजोआज मानिसलाई एकदमै छिटो निराशाले सताइरहेको हुन्छ । किनभने, निराशा केवल एउटा पुस्तामा मात्रै होइन सबै पिँढीमा फैलिरहेको छ । सबै कुरा हुँदा या नहुँदा पनि निराशाले सधैँजसो प्रभाव जमाइरहेको हुन्छ ।
एउटा सानो हास्यप्रद कथा छ–
एउटा सानो बालक डाक्टरकहाँ गयो । त्यसले डाक्टरसँग सोध्यो, ‘डाक्टर साब ! म आफूले आफूलाई जता छुन्छु त्यतै दुख्छ । मेरो घुँडा पनि दुखिरहेको छ । मेरो टाउको पनि दुखिरहेको छ । मेरो कानमा पनि पीडा भइरहेको छ । मेरो नाकमा पनि पीडा भइरहेको छ । सबै ठाउँमा पीडा भइरहेको छ ।’
डाक्टरले उसलाई चेकजाँच गरेपछि भने, ‘तिम्रो औँला भाँच्चिएको छ त्यसैले त तिमी आफ्नो औँलाले जहाँ छुन्छौ त्यहाँ पीडा भइरहेको छ ।’
हामीलाई पनि यस्तै भइरहेको हुन्छ । वास्तवमा निराशाको मूल कारण हामीमा भएको अज्ञानता नै हो ! अनि, अज्ञानता एउटा यस्तो कुरा हो, जुन हामीसँगै हिँडिरहेको हुन्छ । जहाँ हामी जान्छौँ हाम्रो साथैमा हिँडिरहेको हुन्छ । तथापि, हामीले बुझ्नुपर्ने कुरा के छ भने चेतना पनि हाम्रै साथमा छ अनि अचेतना पनि हामीभित्रै छ । अँध्यारो पनि हामीभित्रै छ अनि प्रकाश पनि हामीभित्रै छ । जे कुरालाई तपाईँ अघि सार्नुहुन्छ त्यही नै प्रकट हुन्छ । हामीलाई क्रोधी बन्न कति समय लाग्छ ! एक सेकेन्ड पनि लाग्दैन । किनभने, क्रोध हामीभित्रै छ । सानो कुरामा पनि हामीलाई तुरुन्तै रिस उठ्छ अनि हामीलाई तनाव भइहाल्छ ।
