‘पिसिआर’ परीक्षणले कारोना लागेको पुष्टि गरेपछि आफूलाई सम्हाल्न नसक्दा ‘स्ट्रोक’ का कारण धनुषा जिल्ला बटेश्वर निवासी विष्णु निरौलाको गत हप्ता काठमाडौँमा निधन भयो। परिवारजनका अनुसार उनमा पूर्ववत् कुनै शारीरिक समस्या थिएन। तरउनको मानसपटलमा भने प्रारम्भदेखिनै कोरोना लागेका मानिस मरिहाल्छ नि भन्ने डर भने थियो भन्छन् उनका आफन्त। नभन्दै त्यस्तै भयो। कोरोना लागेको थाहा हुनेबित्तिकै आन्तरिक त्रासका कारण विष्णु निरौला बिते। कोरोनालाई परास्त गर्न सक्छु भन्ने आत्मविश्वास हुँदो हो त शायद अन्य कुनै पूर्ववत् शारीरिक समस्या नभएका विष्णु निरौलाले मृत्यु वरण गर्नुपर्ने थिएन होला भन्छन् स्वास्थ्य विश्लेषकहरू।
गत हप्ता नै काठमाडौँको मूलपानीमा हार्डवेयर पसल सञ्चालन गरेर बसेका राजविराजका स्थायी बासिन्दा कृष्ण पोखरेललाई ‘हर्टअट्याक’ भयो। मुटुमा समस्या आएको थाहा पाउनेबित्तिकै परिवारजनले उनलाई तुरुन्तै अस्पताल लगे। तर अस्पतालले भर्ना लिन कोरोना परीक्षण रिपोर्ट ‘नेगेटिभ’ भएको प्रमाण पेस गर्नुपर्ने भन्यो। पोखरेलका परिवारजनले अस्पतालले भनेअनुरूपको कागजात पेस गर्न सकेनन्। ‘कोरोना फ्रि’ प्रमाणको अभावमा अविलम्ब अस्पताल भर्ना गरी सघन उपचारमा रहनुपर्ने रोगीको कुनै इलाज भएन। राजधानीको साधन र स्रोतको पहुँचमा हुँदाहँुदै पनि उपचारपछि सहजै सन्चो हुनुपर्ने अवस्थाका कृष्ण पोखरेल मृत्यु वरण गर्न पुगे।
कोरोना महामारी सुरु हुनेबित्तिकै संसारभरका मानिसको दैनिकी परिवर्तन भयो। नेपाल अछूतो हुन सम्भव थिएन। अन्यत्रझैँ छोटो समयमै नेपालमा समेत कोरोनाले आफ्नो आयतन बढायो। नेपालीको कार्यतालिका फेरियो। अफिस कार्यालयहरू अनियमित भए। स्कुल कलेजहरू बन्द भए। विद्यार्थीहरू दूरशिक्षाको सहारा लिन पुगे।
