काठमाडौं । साना–साना गल्ली, गल्लीभित्र सानो पसल । त्यही पसलमा पाइन्छन् सस्ता–सस्ता कपडाहरु । त्यसमाथि ग्राहकको समेत भिडभाड । लगनटोल, भोटेबहाललगायतका क्षेत्रका पसलको अवस्था हो यो ।
लामो लकडाउन, कोरोना कहरका कारण आएको आर्थिक मन्त्रीका साथै कतिपयको रोजगारी समेत गुमेका कारण खर्च गर्नसक्ने क्षमतामा ह्रास आएको छ । त्यसैले त यतिबेला न्यूरोड, दरबारमार्गका ब्राण्डेड र महँगा सामान पाइने बजारहरु सुस्ताएका छन् । अझ भन्दा विदेशी बजारबाट ब्रान्डेड सामान आयात गरेर बेच्नेहरुको हालत दयनीय बनेको छ । सपिङ मलहरु नाममा मात्रै खुला छन्, व्यापार हेर्ने हो भने ठप्पप्रायः नै छ । दशैंमा कति आम्दानी हुन्छ भनेर सोच्नेहरु यतिबेला भाडा कसरी तिर्ने भन्ने चिन्तामा देखिन्छन् ।
न्यूरोड क्षेत्रमा कपडाको व्यापार गर्दै आएका जगत बोहोरा विगतका वर्षहरुमा व्यापार राम्रो हुनुका साथै फाइदा पनि राम्रो हुने गरेको स्मरण गर्छन् । तर, यो वर्ष व्यापार नभएको र भइहाले पनि निकै कम नाफा खाएर बेच्नुपर्ने अवस्था रहेको उनको भनाइ छ । उनले भने, ‘पहिले व्यापार पनि धेरै हुन्थ्यो, मार्जिन पनि धेरै नै हुन्थ्यो । अहिले मार्जिन कम गरेर बेच्दा पनि व्यापार हुनै छोडेको छ । अब व्यापार भयो भने अर्कै कुरा, नत्र भाडा कसरी तिर्ने भन्ने तनाव अहिले पनि छ ।’
