बालुवाटारमा समेत देखिएन स्वास्थ्य संवेदनशीलता
प्रधानमन्त्री केपी शर्मा ओलीको सचिवालयका सदस्यहरूले आफूलाई कोरोना संक्रमण भएको सामाजिक सञ्जालबाट एकपछि अर्काेले शनिबार जानकारी गराउँदै थिए । आफ्नो सचिवालयका सदस्यलाई संक्रमण भएकोबारे प्रधानमन्त्री ओली पनि जानकार थिए ।
तर प्रधानमन्त्री ओली, अध्यक्ष पुष्पकमल दाहाल (प्रचण्ड), महासचिव विष्णु पौडेल, प्रदेश ५ का मुख्यमन्त्री शंकर पोखरेल प्रधानमन्त्री निवास बालुवाटारमा छलफलमै ब्यस्त थिए । अघिल्लो साता प्रधानमन्त्रीकी निजी चिकित्सक डा. दिव्या सिंहलाई कोरोना संक्रमण भएको थियो । कार्यालयकै फोटोग्राफर राजन काफ्लेलाई पनि पोजिटिभ देखिएको थियो ।
डा. सिंह र काफ्लेलाई संक्रमण भएलगत्तै बालुवाटारमा कोरोनाको घण्टी बजेको थियो । तर यसतर्फ बालुवाटारले चासो दिएन । उल्टै भेटघाट र छलफल भई नै रहे ।
शनिबार र आइतबार प्रधानमन्त्री सचिवालयका सदस्यहरू विष्णु रिमाल, सूर्य थापा, राजन भट्टराई, ईन्द्र भण्डारी र रामशरण बजगाईँलाई कोरोना संक्रमण देखिएको थियो ।
काठमाडौं उपत्यका यतिबेला कोरोना भाइरस (कोभिड–१९) को हब बनेको छ । सरकारले जनस्वास्थ्यको मापदण्ड कडाइका साथ पालना गर्न उर्दी मात्र जारी गरेको छैन, मास्क नलगाउनेलाई जरिवानासमेत लिन भनेको छ ।
तर नियम बनाउने र पालना गर्न सिकाउने सरकारी निकायले नै आफैँले बनाएको नियमको उल्लंघन गरेको पाइन्छ ।
प्रधानमन्त्रीको सरकारी निवास बालुवाटारले कोरोनालाई बेवास्ता गरेको त होइन भनेर जनस्वास्थ्यका विज्ञहरूले प्रश्न उठाएका छन् । भेला, बैठक र छलफल गर्नुले प्रधानमन्त्री कार्यालय संवेदनशील नभएको देखाउँछ ।
स्वास्थ्य तथा जनसंख्या मन्त्रालयका प्रवक्ता भन्छन्, ‘बालुवाटारले जनस्वास्थ्यको मापदण्ड पालना गरेन । भीडभाड धेरै भयो । अनि संक्रमण फैलियो । सबै पार्टीका नेता, सांसद, जनप्रतिजिधिले जनतालाई सचेत गराउने हो । एकले अर्कोलाई विरोध र खिसिटिउरी गर्ने समय होइन ।’
