काठमाडौं : प्रधानमन्त्री केपी शर्मा ओलीको निगाहमा दोस्रो पटक अर्थमन्त्री बनेका डाक्टर युवराज खतिवडा यस्ता चामत्कारिक व्यक्तित्व भएका प्रतिभा हुन् जसले १५ दिनको अन्तरमा दुईवटा पद पाए। सिंगो नेपाल कम्युनिस्ट पार्टीभित्र अर्थशास्त्री र प्राज्ञहरुको चरम अभाव छ भन्ने यसले पुष्टि पनि गरेको छ। किनकि प्रधानमन्त्रीको नजरमा दलमा खतिवडा जति विलक्षण प्रतिभाका धनी कोही छैन।
मन्त्रिपरिषदको बैठकमा सूचीकृत नै नभएको विषय थियो - प्रधानमन्त्रीका विशेष आर्थिक सल्लाहकार। सरकारका प्रवक्ताले मन्त्रिपरिषद बैठकका निर्णयहरु सुनाउँदा ओली क्याबिनेटका मन्त्रीहरुले पनि थाहा पाए - मन्त्रिपरिषदले डाक्टर खतिवडालाई प्रधानमन्त्रीका सल्लाहकार बनाइसकेछ। प्रधानमन्त्रीको चाहना हो, मन्त्रीहरु बोल्नसक्ने अवस्था रहेन।
भदौ ३० गते सरकारका प्रवक्ताले मन्त्री सरह हैसियतमा खतिवडा प्रधानमन्त्रीका विशेष आर्थिक सल्लाहकार नियुक्त भएको सुनाए। सल्लाहकार बनाएको १५ दिनपछि मन्त्रिपरिषदले फेरि आज अर्को सिफारिस गर्यो - डाक्टर खतिवडा अमेरिकाका राजदूत। पद लोलुपताको कुनै सीमा हुँदैन। सधैं आफ्नो स्टाटसलाई 'क्लिन' राख्न चाहने खतिवडा पनि नेपालभित्रको यो रोगबाट अछुतो रहेनन्। नेपाल राष्ट्र बैंकका गभर्नर, राष्ट्रिय योजना आयोगका उपाध्यक्ष, अर्थमन्त्री अनि अब राजदूत। एक पद सकिँदा अर्को पदको पत्र बुझ्न पाउने उनीजति क्षमतावान यो मुलुकले पाउन सकेको छैन।
