घरबेटी र भाडावालबीच मनमुटाव, तनाव, असन्तुष्टि, विभेद, थिचोमिचो, द्वन्द्व र अवहेलना हुने कुरा वर्षौंदेखि चल्दै आइरहेको छ।
घरबेटी र भाडावालबीच कहिल्यै सौहाद्र्रपूर्ण सम्बन्ध विकास हुन सकेको छैन।
घरधनी र भाडावालबीच सामान्य किसिमका विवाद वर्षौंदेखि चल्दै भोग्दै आइरहेको भए पनि अहिले ज्यानसम्म लिने घटना घट्न थालेका छन्।
जसको प्रत्यक्ष उदाहरण हो- कीर्तिपुरमा घरबेटीले ढोकाको गजबार (आग्लो) प्रहार गरी भाडावाल शम्भु चौधरीको हत्या गर्नु।
घरबहालका सम्बन्धमा निश्चित मापदण्ड, नियमकानुन नबन्दा घरबेटी र भाडावालबीचको दुरी बढ्दै गएको र ज्यानसम्म लिने घटना
घट्न थालेको उपभोक्ता अधिकार अनुसन्धान मञ्चका अध्यक्ष माधव तिमिल्सिना बताउँछन्।
यस्ता दुरी वर्षौंदेखि कायम छन्। भाडावालसँग गुनासाका चाङ छन्। तर, सुन्ने निकाय छैनन्।
वर्षौंदेखि घरधनी र भाडावालबीचको दाउपेच गुमनाम भए पनि अहिले बाहिर आउन थालेको छ।
सर्वसाधारण भाडावाल र घरबहालसँग प्रत्यक्ष सरोकार राख्ने घरबहालका सम्बन्धमा सरकारले कानुन बनाइ मापदण्ड लागू गर्नुपर्ने आवाज उठाइरहेका छन्।
अध्यक्ष तिमिल्सिना घरबहालका सम्बन्धमा कुनै कानुन नहुँदा घरधनीको मनमर्जी चलेको तर भाडावालको बेहाल भएको बताउँछन्।
