एलिजा उप्रेती
सरकारले सेवानिवृत्त कर्मचारीका लागि वर्षेनी अर्बौँ रुपैयाँ खर्च गर्दै आएको छ । सरकारलाई पेन्सनको भार वर्षेनी बढ्दो छ । पाँच वर्षमा मात्रै सरकारले पेन्सन वितरणमा २ खर्ब रुपैयाँभन्दा बढी खर्च गरेको छ । गत आर्थिक वर्ष (२०७६\०७७) मा ५३ अर्ब ५४ करोड रुपैयाँ पेन्सन वितरण गरेको निवृत्तिभरण व्यवस्थापन कार्यालयका प्रमुख मुक्तिनाथ न्यौपानेले बताए । गत आर्थिक वर्षको ( २०७६\०७७) असार मसान्तसम्ममा पेन्सन पाउनेको संख्या २ लाख ८० हजार नाघेको न्यौपानेको भनाइ छ ।
५ वर्ष अघि (२०७२\०७३) २६ अर्ब ९२ करोड ७२ लाख रुपैयाँ पेन्सन वितरण गरेको सरकारले त्यसको ५ वर्षपछि (२०७६\७७) मा ५३ अर्ब ५४ करोड रुपैयाँ पेन्सन वितरणमा खर्च गरेको छ ।
चालु आर्थिक वर्ष झण्डै १० हजार निजामती कर्मचारी, शिक्षक, सैनिक र प्रहरीले अवकाश पाउँनेछन् । जसका कारण सरकारमाथि पेन्सनको भार अझै बढ्नेछ । चालु आर्थिक वर्षका लागि ४७ अर्ब रुपैयाँ पेन्सनको लागि छुट्याइएको छ ।
