‘सेतो हात्ती’ बन्नबाट जोगिएला जनकपुरको रेल ?
काठमाडौँ । जयनगर–कुर्था रेलमार्ग स्तरोन्नति भएर पहिलोपटक रेल सञ्चालनमा आउँदा शुक्रबार सो क्षेत्रका स्थानीयवासीमा एकप्रकारको उत्साह देखियो । उनीहरुमा रेलको प्रतिक्षा कति व्यग्र थियो भन्ने त रेल हेर्ने भीडले नै प्रष्ट्याउँथ्यो । तर, स्थानीयको आँखाको प्यास मेटाएर नेपाली ध्वजाबाहक रेल पुनः भारतीय बजारमा गएर थन्किएको छ । रेल विभाग र रेल्वे कम्पनीका अधिकारीहरुले अब डेढ महिनापछि रेलको सञ्चालन हुने बताएका छन् । कोभिडका कारण नेपाल–भारत सीमानाका बन्द भएको अवस्थामा अहिले रेलको नियमित सञ्चालन गर्न नसक्ने भन्दै सरकारले सीमानाका खुला गरेपछि यो सेवा सुरु हुने नेपाल रेलवे कम्पनीका महाप्रबन्धक गुरु भट्टराई बताउँछन् ।
नेपालको दोस्रो रेलमार्गको रुपमा रहेको यो रेलमार्ग ६ वर्षपछि पुनः सञ्चालनमा आउन लागेको हो । यसअघि रहेको ‘न्यारोगेज’ मार्गलाई बढाएर ‘ब्रोडगेज’ बनाउने भारतको प्रस्तावलाई नेपाली पक्षले स्वीकार गरेसँगै यसको स्तरोन्नति सुरु भएको थियो । ५ अर्ब ५० करोड रुपैयाँ भारतीय अनुदानमा भारतीय कम्पनीले नै इरकन इन्टरनेशनल लिमिटेडले यो रेलमार्गको स्तरोन्नति गरेको हो । त्यसमा भारतकै रेल निर्माण कम्पनी कोनकन लिमिटेडसँग ८७ करोड ४० लाख रुपैयाँ दुईवटा रेल किनेर नेपालले नेपाली ध्वजावहाक रेलको रुपमा यो रेल सेवा सञ्चालन गर्ने तयारी गरेको हो । यही रेल परीक्षणका लागि शुक्रबार जयनगरबाट जनकपुर ल्याइएको हो । प्राविधिक परीक्षणपछि कोनकनले नेपाली पक्षलाई उक्त रेल हस्तान्तरण गर्नेछ ।
