सुजन पन्त
पूर्वी अफ्रिकाको टापुको देश सेसेल्समा कोरोनाभाइरस (कोभिड–१९) संक्रमणबाट एकजनाको पनि मृत्यु भएको छैन । जुलाईमा त्यहाँ ११ जनालाई कोरोनाभाइरस संक्रमण देखियो । त्यही पनि सबै निको भइसके । अहिले त्यहाँ एकजनामा पनि कोरोना छैन ।
तर, त्यही देशमा रोजगारीमा पुगेका दर्जनौँ नेपाली अहिले अलपत्र अवस्थामा रहेका छन् । सरकारले सीमित देशमा नियमित उडानमार्फत नेपालीलाई स्वदेश फिर्ता ल्याएपछि त्यहाँका पीडित नेपालीले रोइकराई गर्दा पनि कुनै सुनुवाइ भएको छैन ।
एक हजारको हाराहारीमा नेपालीहरु रोगजारीको सिलसिलामा सेसेल्समा छन् । जसमध्ये ३ सयको हाराहारीमा सेसेल्स प्रहरीमा कार्यरत छन् । बाँकी ७ सयमा कोही होटलमा काम गर्छन् भने कोही सामान्य पसलदेखि हाउस किपिङसम्मको काम गर्छन् ।
कोरोनाभाइरसको कारण विश्वको सबै मुलुक प्रभावित बनेको छ । कोरोनाभाइरस नदेखिएपनि सेसेल्स पनि भाइरसबाट प्रभावित बन्न पुगेको छ । विदेशी नागरिक (पर्यटक) हरु घुम्न जान छाडेपछि सेसेल्समा सञ्चालित होटल व्यवसाय धरासयी बन्न पुगेको हो ।
सोही कारण सेसेल्स गएका करिब एक सय नेपालीको रोजगारी गुमेको छ । रोजगारी नै गुमेपछि उनीहरु त्यहाँ बस्न चाहेका छैनन् । सरकारले कहिले उद्धार गरेर स्वदेश फर्काउला भनेर प्रतीक्षामा बसेका छन्, उनीहरु ।
