एलिजा उप्रेती
पछिल्लो समय सहकारीहरुमा पनि पैसा थुप्रनेक्रम बढेको छ । कर्जा माग गर्नेभन्दा निक्षेप राख्नेहरु बढी छन् । सहकारीमा पैसा राख्नेहरु बढ्नुमा पछिल्लो समय सहकारीले आम मानिसको विश्वास जित्दै गएको विश्लेषण विज्ञहरुले गर्न थालेका छन् । अर्कोतर्फ बैङ्कहरुले बचतमा ज्यादै न्यून ब्याजदर दिएपछि त्यता राखेको निक्षेपसमेत सहकारीमा आउन थालेको हो कि भन्ने अनुमान छ ।
सहकारीहरुले कारोबार गर्ने राष्ट्रिय सहकारी बैङ्कमा साउन यता निक्षेप सङ्कलनमा ह्वात्तै वृद्धि भएको छ । साउन र भदौमा सात अर्बभन्दा बढी निक्षेप सहकारी बैङ्कमा आएको छ । अहिले बैङ्कसँग ५० प्रतिशतभन्दा बढी तरलता (लगानीयोग्य रकम) रहेको बैङ्कका सीईओ (प्रमुख कार्यकारी अधिकृत) बद्री गुरागाईंले जनाएका छन् ।
भदौ लागेयता २०/२५ करोड रुपैयाँ मात्र सहकारी बैङ्कबाट झिकिएको छ । सहकारी संस्थाहरुले निषेधाज्ञाको समयमा सो रकम झिकेका हुन् । यो सामान्य अवस्थाभन्दा केही बढी भएको बैङ्कका सीईओ गुरागाईंले जानकारी दिए ।
सहकारी संस्थाहरुले आफ्ना सदस्यहरु दशँैको लागि पैसा झिक्न आउनेक्रम विस्तारै बढ्ने भएकाले दशैँको जोहो गर्न रकम झिक्ने क्रममा केही वृद्धि भएको हुनसक्ने अनुमान सहकारी बैङ्कको छ । यद्यपि पहिलो चरणको लकडाउन घोषणाको केही दिन पैसा झिक्नेहरु ह्वात्तै बढे पनि निषेधाज्ञामा सामान्य अवस्थाभन्दा ५/१० करोड मात्र तलमाथि भएको गुरागाईंको भनाइ छ ।
