माया श्रेष्ठ
वीपी कोइराला स्वास्थ्य विज्ञान प्रतिष्ठान धरानमा कोरोनाको उपचारमा खटिएका नर्स र सहयोगीहरू गत बुधबार आन्दोलनमा उत्रिए । जोखिम भत्ता दिनुपर्ने, पिपिईको व्यवस्था, मास्क र पञ्जा पर्याप्त मात्रामा दिनुपर्ने, कोरोना बीमा गरिनुपर्ने लगायतका १६ बुँदे उनीहरुको माग थिए ।
गत मंगलबार नोबेल शिक्षण अस्पताल विराटनगरमा कार्यरत ५५ जना नर्स र प्यारामेडिक्सहरूले सामूहिक राजीनामा दिए । उनीहरुको भनाइ जोखिम भत्ता उपलब्ध नगराइएको र कोराना संक्रमित स्वास्थ्यकर्मीलाई अस्पतालमा आइसोलेसन बनाएर नराखिएको, हेल्थ प्रोटोकल विपरीत जोखिमपूर्ण अवस्थामा काममा लगाइएको भन्ने थियो ।
यता काठमाडौंको बानेश्वरस्थित एक होस्टलमा क्वारेन्टिनमा बसेका चिकित्सकमाथि केही दिन अघिमात्रै एक हुल मानिसले अमानवीय व्यवहार देखाए । नागरिक अस्पतालका स्वास्थ्यकर्मीहरुलाई राख्ने क्वारेन्टाइन थलोको रुपमा सो होस्टेल प्रयोग गरिएकोमा उनीहरुको आपत्ति थियो ।
माथिका दृष्टान्तहरु केही प्रतिनिधिमुलक घटनाहरु हुन् । ती घटनाहरुले देखाउँछः कोरोनासँग जुध्नका अग्रमोर्चामा खटिएका स्वास्थ्यकर्मीहरु अहिलेको विषम परिस्थितिमा जोखिमपूर्ण ढंगले काममा खटिन बाध्य छन् । उनीहरुमाथि देशका विभिन्न भागमा दुव्र्यवहार हुँदै आएको छ ।
