सोमवार बेलुकी चन्द्रकला लामगडे खाना खाँदै थिइन्, झापाको मेचीनगर नगरपालिका १३ स्थित चारआलीमा। बेलुकीको करिब ८ बजेको हुनुपर्छ। दुई जनाले एउटा मान्छेलाई लखेट्दै ल्याए - जातीय गाली गर्दै।
लखेट्ने व्यक्ति थिए ५२ वर्षीय दुर्गा श्रेष्ठ र उनकी पत्नी विष्णु। लखेटिने व्यक्ति थिए राजन दर्जी।
‘ती व्यक्तिलाई लखेट्दै ल्याएछन्। ए (दमै डुम्रा) तँ क्वारेन्टाइनमा बसेको भन्दै रोडमा कुदाउँदै ल्याए। त्यो दाइले (राजन) चाहिँ मलाई मार्न लाग्यो बचाउनु बहिनी भनेर भन्यो,’ चन्द्रकलाले भनिन्।
१३ औँ दक्षिण एसियाली खेलकुदमा समेत सहभागिता जनाइसकेकी नेपाल प्रहरीमा कार्यरत लामगडेको पछाडि आएर ती व्यक्ति बसे। जातीय विभेद गर्न नहुने भन्दै उनले लखेड्ने दम्पतीलाई बुझाउन खोजिन्।
