काठमाडौं । विश्वभर छरिएर रहेका नेपालीहरुको संस्था गैरआवासीय नेपाली संघ (एनआरएनए) मा सुधारको प्रयास थालिएको छ । विश्वका ८३ देशमा संगठित भएर ८० हजारको हाराहारीमा सदस्य भएको एनआरएनमा आर्थिक अराजकता मौलाएको भन्दै आलोचना हुँदै आएको बेला सांगठानिक पुर्नरसंरचना तथा विधान संशोधन लगायत प्रस्ताव पारित गरिएको छ ।
एनआरएनएको शनिवार सम्पन्न अन्तर्राष्ट्रिय समन्वय समिति (आइसीसी) को बैठकबाट सदस्यता शुल्क, राष्ट्रिय (एनसीसी) तथा अन्तर्राष्ट्रिय परिषद् (आईसीसी)को निर्वाचन प्रक्रिया, अनलाइन मतदान, महाधिवेशन प्रतिनिधि चयन लगायतका क्षेत्रमा पुनर्संरचना गर्नेसम्वन्धी प्रस्ताव पारित भएको अध्यक्ष कुमार पन्तले रातोपाटीलाई जानकारी दिए ।
