करुणा र कोरोना यी दुई शब्द सुन्दा उस्तै उस्तै लाग्ने छन् तर यिनको प्रभावमा आकाश पातालको फरक छ । कतिपय मानिसहरुले करुणा भाइरस भनेको पनि सुनेँ । भन्ने, सुन्ने र बुझ्ने बीचको फरकले अप्ठ्यारो परिस्थिति पनि निम्त्याउन सक्ने रहेछ ।
छिमेकी देश भारतमा लकडाउन उल्लङ्घन गरेर हिडेका व्यक्तिहरुलाई प्रहरीले लाठी चार्ज गर्दै, समात्दै, “मुर्गा” बनाउँदै गरेको देखियो । यस्तै शृङ्खलामा एउटा समूहको नेता चिच्याउँदै थियो “भागो मत् मारो” उसको कुरा सुनेपछि भिड झनझन क्रोधित भएर प्रहरीमाथि ढुङ्गा बर्साइ राखेका थिए । पछि थाहा भयो उनीहरुले बुझेछन् “भागो मत, मारो” भनेको ! “मत्मारो” लाई “मारो” भन्ने बुझ्दा ठूलो नोक्सान भयो ।
प्रष्टसँग आफ्ना कुराहरु भन्न सक्ने कला सिक्नु पनि जरुरी हुन्छ, र आफ्ना कुराहरुलाई समय सान्दर्भिक बनाएर प्रस्तुत गर्न बिस्तृत ज्ञान र बलिया आधारहरु चाहिन्छन् ।
