४ भदौ, काठमाडौं । संघीय संसदका सांसदहरुले लगाउने लोगो अस्वीकार भएपछि पुनः बनाउँदा लाग्ने खर्च कसले ब्यहोर्ने भन्ने विवाद देखिएको छ ।
लोगोमा राखिएको नक्सा नमिलेको र भद्दा देखिएको भन्दै सार्वजनिक रुपमा आलोचना भएपछि संसद सचिवालयले निर्माणकर्ता घरेलु तथा साना उद्योग कार्यालय ललितपुरलाई फिर्ता पठाएको छ ।
संघीय संसदका पदाधिकारी र सदस्यले लगाउने ३५० लोगो बनाउँदा २० लाख रुपैयाँ खर्च भएको छ ।
उक्त लोगोमा २ लाल सुनको जलपमा १ तोला चाँदीको लेप लगाइएको थियो । पित्तलको नक्सामा चाँदीको बेस थियो । लोगोको पुछारमा रहेको दुई हातमा चाहिँ तामा प्रयोग गरिएको थियो ।
घरेलु तथा साना उद्योग कार्यालय ललितपुरका अधिकृत गणेश राउतले पुनः लोगो बनाउँदा पहिले प्रयोग भएको सुन, तामा र पित्तल पुनः प्रयोग गर्न नमिल्ने बताए । चाँदी भने त्यसकै प्रयोग गर्न सकिन्छ ।
‘नयाँ बनाउँदा तताउनुपर्छ । तताउँदा प्लास्टिक कोटेड (टल्किने) पग्लिन्छ । सुन जलप हो खेर गइहाल्छ, तामा तातोले कालो हुन्छ’ उनले भने ।
सुनको भाउ पहिले भन्दा महंगो भएकाले अब पहिलेजति लोगो बनाउँदा पनि धेरैखर्च लाग्ने बताए । ३५० थान लोगोका लागि अब ७ लाख रुपैयाँको सुन चाहिने अनुमान गरिएको छ । त्यसैगरी तामा र पित्तलसमेतको खर्च जोड्दा १० लाख रुपयाँ खर्च लाग्ने राउत बताउँछन् ।
