कोरोना भाइरसको संक्रमण फैलिन नदिन सरकारले विभिन्न उपाय अवलम्बन गरेको जनाएको छ र व्यवहारमा पनि केही अपनाएकोजस्तो देखिएको पनि छ ।
यसको संक्रमण फैलिन नदिने मुख्य उपायका रूपमा विश्वभर भौतिक दूरी कायम गर्नुलाई प्रभावकारी मानिएको छ ।
विभिन्न अनुसन्धानबाट यो पुष्टि पनि भइसकेको छ । त्यसैले नेपालमा पनि भौतिक दूरी कायम गर्न विभिन्न उपाय अपनाइएको छ । सम्भावित जोखिमले भरिएको त्यस्ता क्षेत्रलाई पूर्ण बन्द तथा आंशिक कडाइ गरिएको छ ।
तर, सार्वजनिक सवारीसाधनको सञ्चालनपछि कोरोना ती सवारीसाधनबाट नै फैलने खतरा त बढेको छैन ?
हो, सार्वजनिक सवारीसाधान खोल्नुअघि विभिन्न मापदण्ड बनाइएको भए पनि उक्त मापदण्डहरूको पाना शून्यप्राय अवस्थामा छ ।
व्यवसायीहरूले सवारीसाधन सञ्चालनका लागि भाडा बढाउन ठुलो सौदाबाजी गरे । र भाडा बढाएर नै सवारीसाधन खोले पनि । तर, उनीहरू कोरोना संक्रमण फैलिन नदिन तयार पारिएको र आफैँले स्वीकार गरेको मापदण्ड पालना गर्न उदासीन मात्र होइन पूरै बेवास्ता गरेर हिँडेका छन् ।
