२९ साउन, काठमाडौं । नेपालको एकमात्र सरुवा रोग अस्पताल हो- शुक्रराज ट्रपिकल तथा सरुवा रोग अस्पताल, टेकु । अघिल्ला वर्षहरुमा अन्य भाइरल रोगका बिरामीको उपचार गर्ने टेकुमा यतिबेला कोरोना संक्रमण परीक्षण गर्नेहरुको लाइन छ ।
तपाईलाई लाग्न सक्छ, देशभरका कोरोना संक्रमितको रिपोर्ट सार्वजनिक गर्ने अस्पताल त निकै व्यवस्थित होला । यो पनि अपेक्षा होला कि कोरोना संक्रमण संख्या बढिरहेका बेला टेकुमा पुगेर अन्य अस्पतालले व्यवस्थापनको पाठ सिक्न पाउलान् ।
टेकु अस्पतालको माहौलले अर्कै सन्देश प्रवाह गर्छ । शुक्रबार बिहानैदेखि परीक्षणका लागि लाइनमा बसेका अनिल चौधरी भन्छन्, ‘आफू र परिवारलाई सुरक्षित राख्नका परीक्षण गर्न आएको, झन् यहाँबाटै कोरोना सर्ला भनेर डराई-डराई बस्नुपरेको छ ।’
चौधरी दुई हप्ताअघि चाटर्ड फ्ल्याइटमार्फत भारतबाट नेपाल आएका हुन् । विहीबार सात बजे नै आएर लाइनमा बसेका अनिलले साढे १२ बजेसम्म स्वाब दिनसमेत पाएका थिएनन् । तैपनि, यसमा उनलाई दुःख छैन ।
कोरोना परीक्षणका लागि अस्पतालमा दिनहुँ सयौँको संख्यामा भीड लाग्ने गर्छ । अस्पतालले दैनिक तीन सय सर्वसाधारणको स्वाब संकलन गर्दै आएको छ ।
