५० वर्षीय गोरख जेठारा अघिल्लो दिन ६ जना आफन्तको मलामी गए। अर्को दिन उनले गाउँ नै छाडिदिए।
असार १९ गते राति आएको पहिरोले बझाङको केदारस्युँ गाउँपालिका-८ मा रहेको उनको घरखेत सबै बगाइदियो।
आगनसँगै जोडिएको आफन्तका घरमा सुतिरहेका ६ जनाको पहिरोमा पुरिएर ज्यान गयो। गाउँकै एक जना अझै बेपत्ता छन्।
अघिल्लो दिन सबै गाउँले आ-आफ्नै काम गरि फर्केका थिए। बेलुकाको खाना खाएर सुतेका थिए।
त्यो रात बाहिर पानी परिरहेको थियो।
दुई छोरी, दुई छोरा र श्रीमतीसहित गोरखको छ जनाको परिवार माटोको गाह्रोले चिनेर ढुंगाले बनेको घरको पाणमा सुतिरहेको थियो। बीचको तलामा रासन र सामान राखिएको थियो। भुइँतलाको गोठमा दुई गाई, एक भैंसी र दुई हल गोरु थिए।
‘राति साढे १२ बजेतिर ठूलो आवाज आएर म ब्युझेँ,’ गोरखले भने।
सुरूमा त उनलाई भूकम्प आएजस्तो लाग्यो।
