भारतले कब्जामा लिएको नेपाली भूमि गुन्जी, कालापानी र लिम्पियाधुरा क्षेत्रमा नेपालीको प्रवेशमा रोक लगाउन गरेको पत्राचारको जवाफ नेपालले फर्काएको छ । जिल्ला प्रशासन कार्यालय दार्चुलाले भारतलाई पत्र पठाउँदै गुन्जी, कालापानी र लिम्पियाधुरा नेपाली भूमि भएकाले त्यहाँ जान भारतको अनुमति आवश्यक नरहेको जवाफ फर्काएको हो ।
दार्चुलाका प्रमुख जिल्ला अधिकारी शरदकुमार पोखरेलले बाह्खरीसँग भने,“त्यो क्षेत्र नेपालकै हो । सुगौली सन्धीको धारा ५ मा भएको व्यवस्था, त्यतिबेला नेपाल सरकार र इष्ट इन्डिया कम्पनीबीच भएको सम्झौताको धारा ५, त्यतिबेलाका नक्साहरु र ऐतिहासिक तथ्य प्रमाणहरुको आधारमा त्यो नेपाली भूमि हो । त्यहाँ नेपालीले आवगमन गर्नु स्वाभाविकै रहेको र त्यहाँ आवागमन गर्ने नेपालीलाई कुनै पनि तत्वबाट अवरोध नगर्न भनेर पत्र पठाएका हौं ।”
उनले सो क्षेत्र पूर्णरुपमा नेपालको रहेको र त्यहाँ हिँडडुल गर्न नेपाली नागरिक पूर्णरुपमा स्वतन्त्र रहेको पनि पत्रमा उल्लेख गरेको बताए ।
