पछिल्लो केही महिनायता सत्तारूढ दल नेपाल कम्युनिस्ट पार्टी (नेकपा)भित्र दुई गुटको फूटबल खेल चलिरहेको छ । खेल विधि, विधान र नियम संगत चलेको त छैन त्यही पनि बाहिरबाट हेर्दा समाधानको सूत्र (बल) कहिले यता कहिले उता गुडिरहेको छ ।
सञ्चारमाध्यमहरूमा आएका पछिल्ला राजनीतिक टिप्पणी र विश्लेषणमा 'बल फलानाको कोर्ट'मा भन्ने उक्ति सुन्न/पढ्न पाइन्छ । तर वास्तविक बल चाहिँ प्रधानमन्त्रीको रूपमा सत्ताको चाबी र पार्टी अध्यक्षका रूपमा पार्टीको चाबी बोकेर हिँडेका केपी शर्मा ओलीले आफ्नै खुट्टामा लिएर हिँडेका छन् र बेलाबेलामा विपक्षीको पोस्टमा गोल गरिरहन्छन् ।
