जब नेपाली क्रिकेटले मारेको फड्कोबारे कुरा हुन्छ तब चर्चा हुन्छ पारस खड्का, शरद भेषावकर, ज्ञानेन्द्र मल्ल, शक्ति गौचन लगायतको।
यी खेलाडीको नाम त्यतिखेर आउँछ जब डिभिजन ५ बाट एक दिवसीय वरियताको अहिलेसम्मको अवस्थामा नेपाली क्रिकेटको चर्चा हुन्छ। क्रिकेट व्यवसायिक बनेपछिको अवस्थाबारे बोल्ने हो भने सन्दीप लामिछाने छुट्ने कुरै भएन।
यी बाहेक नेपाली क्रिकेटमा कयौँ खेलाडी आए। कतिले क्रिकेटमै लामो समय बिताए। जमे। केही छोटो समय क्रिकेटमा रमाए र विदेशिए। केहीका लागि क्रिकेट रहर बन्यो कर्म बनेन। तर, फिल्डमा केही समय उत्रिएका उनीहरुलाई क्रिकेटले पहिचान भने दियो। किनभने अहिले नेपाली क्रिकेट जुन उचाइमा छ त्यहाँसम्मको यात्रा तय गर्न उनीहरुको योगदान थियो कहीँ न कहीँ।
