‘सेनाले आफ्नो चरित्रभन्दा बाहिरको काम गर्दिन भन्न सक्नुपर्छ’
निजामती सेवाको विकल्प सेना होइन, हुनै सक्दैन । त्यसैले राज्यले सेनालाई निजामती सेवाभन्दा अलग्गै जंगी सेवाको रूपमा परिकल्पना गरेको हुन्छ र उसको लागि भिन्नै नीति–नियम–कानून निर्धारण गरेको हुन्छ । निजामती क्षेत्रले सम्पादन गर्ने काम र जंगी क्षेत्रले सम्पादन गर्ने कामको प्रकृति, प्रवृत्ति र चरित्र नै भिन्न खालका हुने गर्छन् र त्यसैअनुसार उसका लागि जिम्मेवारी तोकिएका हुन्छन् ।
निजामती प्रशासनबाट मात्रै सम्पादन हुन नसक्ने विशिष्ट परिस्थिति, आपतकालीन परिस्थितिहरूमा सहजकालमा निजामती क्षेत्रका लागि छुट्याइएका क्षेत्रमा पनि सेनालाई जिम्मा दिइन्छ, परिचालन गरिन्छ । यसको सोझो अर्थ के हो भने त्यस परिस्थितिमा ती काम निजामती प्रशासनबाट सम्पादन हुन सम्भव छैन, त्यसका लागि सेनाकै सहयोगको आवश्यकता पर्दछ । अर्थात् निजामती प्रशासनले गर्न नसक्ने वा निजामती प्रशासन फेल खाँदा आपतकालीन रूपमा स्थिति सम्हाल्न सेनाको साथ सहयोग लिने गरिन्छ ।
