अर्थमन्त्री डा. युवराज खतिवडाले आर्थिक वर्ष २०७७–७८ का लागि १४ खर्ब ७४ अर्ब ६४ करोडको बजेट ल्याएका छन्। यो गत वर्षको अनुमानित बजेटभन्दा ५८ अर्ब ३२ करोड कम र संशोधित अनुमानभन्दा करिब ४ खर्ब बढी हो।
सरकारले आर्थिक वर्ष २०७५–७६ मा गरेको कुल खर्च ११ खर्ब १० अर्ब थियो। यो आधारमा भन्ने हो भने, सबै परिस्थिति अनुकूल भएमा हामीहरूको अहिलेको खर्च गर्ने क्षमता १२ खर्ब हाराहारी हो।
यसरी हेर्दा यो बजेट २ खर्ब जति बढी देखिन्छ। तर अहिले विशेष परिस्थिति भएको सन्दर्भमा यो बजेटको आकार ठूलो भन्न मिल्दैन। निजी क्षेत्र शिथिल भएको, आम जनताको रोजगारी गुमेको, विदेशबाट रोजगारी गुमाएर फर्कने संख्या बढ्ने देखिएको तथा लाखौं परिवारको दैनिक जीवनयापनमा नै प्रश्न चिह्न खडा भएका बेला बजेट आकार केही ठूलो हुनु सान्दर्भिक देखिन्छ। महत्वपूर्ण कुरा, सरकार यो बजेट खर्च गर्न सक्षम छ कि छैन, बजेटको क्षेत्रगत बाँडफाँट कस्तो छ र यो खर्चको स्रोत जुटाउन सरकार सक्षम छ कि छैन भन्ने हो।
