लकडाउन भएपछि घरभित्रै के गर्दै बस्ने, कसरी समय कटाउने भनेर सोचेका भए तनावग्रस्त भइन्थ्यो होला । तर, केही न केही नयाँ काम गर्दै बस्दा कुनै पनि दिन पट्यारलाग्दो भएन । लकडाउन सुरु भएसँगै सागसब्जी रोप्ने, फूलहरु रोप्ने काम गरियो । एक महिनाभन्दा लामो अवधीमा आफैले रोपेका फूलहरु छत र बार्दलीभरी फुलेका छन् । सागसब्जीले हराभरा भएको छ । कहिले मल र माटो तयार गर्ने, कहिले गोडमेल गर्ने, कहिले सिंचाई गर्ने काममै तल्लिन भइयो । अहिले आफैले रोपेको सागसब्जी लहलह भएको देख्दा मन पनि पो हराभरा हुन्छ ।
गाउँघरमा त लकडाउनले पनि खास असर गर्दैन । गाउँमा मान्छेको चहलपहल नहुने भएकाले आफ्नो घर वा खेतबारीमा निर्धक्क काम गर्न सक्छन् । त्यसैले गाउँघरको जीवनशैली अहिले पनि उस्तै छ, जुन लकडाउन अघि थियो । तर, शहरभित्र त्यस्तो अनुकुलता हुँदैन । न घर बाहिर निस्कदा सुरक्षित हुन्छ, न खेतीबाली गर्ने मेलोमेसो नै । जग्गा–जमिन भए पो खेतीबाली गर्नु ?
