वर्षौसम्म बघौडाको नामले चिनियो बाँकेको नरैनापुर। विकासको दृष्टिले हेर्दा यसलाई बाँकेको ‘कर्णाली’ भनिन्थ्यो, अझै भनिन्छ।
जिल्लाको दक्षिण पूर्वी यो पालिकामा न विजुली छ, न त राम्रो शिक्षा र स्वास्थ्य। हुलाकी सडकको देन भनौँ, बाटोसम्म राम्रो बन्दैछ। नेपालगञ्जदेखि ४४ किलोमिटर (अन्तिम बिन्दु) मा ६ वटा गाविस मिलेर बनेको यो पालिका सधैंको उपेक्षित थियो भन्दा फरक पर्दैन।
नेपालगञ्जमा आइपुग्ने केन्द्रका ठूला नेता हुन् वा जिल्लाकै नेता, उनीहरुले विकासमा पछि परेको र अब उठाउनु पर्छ भनेर नाम लिने यही पालिकाको हो। सधैं विकासमा पछि परेको भनेर सम्बोधन हुने नरैनापुर यतिबेला कोरोनाको ‘हटस्पट’ भनेर चर्चामा आएको छ।
