सत्तारुढ नेपाल कम्युनिस्ट पार्टी (नेकपा) भित्रको विवाद र परिवर्तित शक्ति सन्तुलनका कारण अमेरिकासँग भएको मिलेनियम च्यालेन्ज कम्प्याक्ट (एमसीसी) संसदबाट अनुमोदन हुने सम्भावना क्षीण बन्दै गएको छ।
एमसीसी जस्ताको तस्तै पारित गराउने पक्षमा रहेका प्रधानमन्त्री केपी शर्मा ओली अहिले पार्टीभित्र कमजोर बनेका छन्। पार्टीको केन्द्रीय समितिले बनाएको कार्यदलले पनि सम्झौता जस्ताको तस्तै अनुमोदन नगर्न सुझाव दिएको छ।
‘केन्द्रीय कमिटीले गठन गरेको कार्यदलले प्रतिवेदन बुझाएको पनि लामो समय भयो,’ नेकपाको विदेश विभागका उपप्रमुख विष्णु रिजालले भने, ‘एमसीसीको विषयमा पार्टीले चाँडै धारणा बनाउँछ।’
माघमा भएको केन्द्रीय समितिको बैठकले पूर्वप्रधानमन्त्री झलनाथ खनालको नेतृत्वमा एमसीसीबारे अध्ययन गरी सुझाव दिन भन्दै कार्यदल गठन गरेको थियो। फागुन ९ गते कार्यदलले अध्यक्षद्वय ओली र पुष्पकमल दाहाल प्रचण्डलाई प्रतिवेदन बुझाएको थियो। त्यसपछि लामो समय प्रतिवेदन गोप्य राखिएको थियो।
