गएको चैत ९ गते दुनी पुन र उनका कान्छा छोरा सूर्यमान काठमाडौं आइपुगे।
दुनीको वर्षौ पुरानो सपना हो - काठमाडौं शहर घुम्ने। सधैं कथामा सुनेको शहरको व्याख्या आफ्नै शब्दमा गर्ने। तर, यसपाला काठमाडौंको यात्रा जुर्यो छोराकै कारण।
प्युठानबाट हिँड्ने बेलामा पटुकीमा १० हजारको बिटो कसेकी थिइन्। घरबाट निस्किएदेखि उनको हात घरी पटुकीमा पुग्थे त घरी सूर्यमानको निधारमा। छोरा सूर्यमानको उपचारका लागि हिँडेका थिए उनीहरु। त्यसैले काठमाडौंको पहिलो यात्राका लागि साँचेको उत्साह बाँकी थिएन। छोराको उपचार गर्ने, औषधी किन्ने। मिल्यो भने चिडियाखान पनि घुम्ने योजना थियो दुनीको।
+++
उनका जेठो छोरो धनीराम २४ वर्षका भए। भाइलाई बिरामीले बेस्सरी च्याप्दा उनी भर्खर दार्जिलिङ पुगेका थिए, पैसा कमाउन। यस पटक जम्मा गरेको पैसाले भाइको र आफ्नो परीक्षा फि तिर्नु थियो। किताब पनि किन्नु थियो। उनीहरु सँगै ब्याचलर्स भर्ना भएका थिए।
धनीरामकी श्रीमती पर्मा गर्भवती छिन्। वैशाखको तेस्रो साता बच्चा जन्मिने बताइएको थियो। त्यसैले श्रीमतीका लागि सुत्केरी खर्च पनि जोहो गर्नु थियो। एक्लैको कमाइले सबै खर्च पुर्याउन मुश्किल नै पर्ने हिसाब देखियो। त्यसैले १९ वर्षीय भाइ सूर्यमानलाई पनि जागिर खान बोलाए। काम चाहिँ दार्जिलिङका होटलहरुमा भाडा माझ्ने र सरसफाइ गर्ने।
बस्दा, खाँदा ठीकठाक रकम जोगिन्थ्यो।
