डा नरेन्द्र सिंह ठगुन्ना र सरोज गिरी
कोभिड–१९ ले विश्व त्रासित छ। यस भाइरसको संक्रमणबाट १ लाख ८६ हजार भन्दा बढि व्यक्तिको मृत्यु भइसकेको छ। त्यस्तै २७ लाख १४ हजार भन्दा बढि संक्रमित भएका छन्। हजारौं व्यक्तिहरु यो महामारीसँग जीवन र मरणको युद्ध लडिरहेका छन्। सबैभन्दा बढि अमेरीका र युरोपका विकसित राष्ट्रमा भएको मानव क्षतिले प्रमाणित गरेको छ कि समृद्धि, सम्पत्ति र वैज्ञानिक आविष्कारले मात्र प्रकृतिमाथी विजय पाउन सम्भव रहेनछ।
कोरोना भाइरसको कारण देखिने मानसिक अस्वस्थ्ताका लक्षणहरु
लक्षणहरु व्यक्तिपिच्छे फरक हुन्छन्। प्रकोपप्रति कसरी देखाइने प्रतिक्रिया व्यक्तिको पृष्ठभूमि र समुदायमा भर पर्छ। तर, प्राय मानिस मानसिक समस्यामा पर्ने जोखिम परिस्थिति हेरी फरक स्तरको हुन्छ।
कोरोना भाइरसबाट संक्रमित होला भन्ने डर, पारिवारका सदस्य, आफन्त र प्रियजनहरूको स्वास्थ्यबारे चिन्तित हुनु, खाँदै नखाने वा धैरै खाने, आत्तिनु, छटपटी हुन,असुरक्षित महसुस हुनु, अनिश्चितता र एक्लोपनको महसुस हुनु,चिन्ता, अविश्वास र डरको महसुस हुनु, काम गर्ने उर्जा र क्षमतामा परिवर्तन आउनु, ध्यान केन्द्रित गर्नमा कठिनाइ, निदाउनमा कठिनाइ जस्ता लक्षणहरु देखिन सक्छन्। त्यस्तै डरलाग्दो सपना र नराम्रो सोचाइ तथा झझल्को आइरहनु, टाउको दुख्ने, शरीर दुख्ने, पेट तथा पाचन प्रणालीमा गडबडी, रक्तचाप बढ्ने, श्वासप्रश्वासको गतिमा परिवर्तन हुने, छालामा डावर आउने जस्ता शारीरिक प्रतिक्रियाहरू देखिनु,दीर्घकालीन स्वास्थ्य समस्याहरू भएमा अझै बिग्रँदै जानु,चिडचिडापन बढ्नु, झनक्क रिस उठ्नु,मद्यपान, धुम्रपान वा लागूपदार्थको प्रयोग गर्नु तथा मात्रा बढ्दै जानु,उदाससिनता वा निराशा महसुस हुनु,निराशापन, असहायपनको महसुस हुनु आदी हुन्।
