सहनशीलताकी खानी आमा

मायाकी गहिराइ आमा

त्याग तपस्याकी स्वरूप आमा

जीवनको मिठासकी रूप आमा

श्रद्धा भक्तिकी रूप हो आमा

भगवानको रूप हो आमा

आमा तिम्रो वर्णन गरेर सकिन्न

आमा तिम्रो माया तिरेर सकिन्न

आमा तिम्रो आशीष सधैँ

सन्तानमा बसिरहोस्

बसिरहोस्

जब गर्भमा सन्तान बस्छ, त्यतिबेलैदेखि आमामा सन्तानप्रति अगाध माया उत्पन्न हुन्छ। अर्थात आफ्नो सन्तानलाई माया दिनुपर्ने शिक्षा उनलाई कसैले दिनैपर्दैन। यही स्वतस्फूर्त उत्पन्न मायाको स्रोत जिन्दगीभर सुक्दैन। आफ्ना सन्तानप्रति मायाले अविरल सिँचित गर्न लालायित हुन्छिन् उनी। आफूलाई जतिसुकै पीडा किन नहोस्, आफैँले जन्माएको सन्तानले चित्त दुखाएको किन नहोस् तर आमाले प्रदान गर्ने मायाको स्रोत कहिल्यै सुक्खा हुँदैन। अर्थात उनको काख सन्तानका लागि अहोरात्र प्रतीक्षारत रहन्छ । त्यसैले त सन्तानले जहिले पनि आमाको अभिभावकत्व खोजिरहेको हुन्छ।