माेहन विष्ट
विश्वमा कोरोना भाइरसको संक्रमणपछि त्यसबाट सिर्जित समस्यामा मानिसले विभिन्न तरिकाले सहयोगका हात अघि बढाइरहेका छन् ।
यस्तैमा कञ्चनपुर कारागारका कैदीबन्दीले उदाहरण पेस गरेका छन् । कैदीबन्दीले सरकारबाट पाउने रासनमध्ये केही जोगाएर गरिब, विपन्न एवं दैनिक ज्यालादारी गरी गुजारा चलाउने मजदुर वर्गका लागि खाद्यान्न सहयोग गरेका छन् ।
उनीहरूले लकडाउनका समयमा खाद्यान्न समस्या भएका विपन्न समुदायलाई वितरणका लागि खाद्यान्न सहयोग गरेका हुन् । मंगलबार कैदीबन्दीले प्रमुख जिल्ला अधिकारी नूरहरिप्रसाद खतिवडालाई खाद्यान्न हस्तान्तरण गरेका छन् ।
