वारि नेपालको दार्चुला छ पारि भारतको धार्चुला छ । बीचमा छ कतैका कसैको गिद्धेदृष्टि परेको, र कसैले कुनै बेला आफ्ना ख्वामित्का पाउमा सभक्ति अर्पण गर्न खोजेको महाकाली नदी । नदीमाथि पुलको द्वारमा ताल्चा ठोकिएको छ, र वारि नदी किनारमा ठाउँ–ठाउँमा तैनाथ छन् सशस्त्र प्रहरीका टुकडीहरु । शिरमा छ क्याप टोपी, जिउमा बाघे बर्दी, हात–हातमा ज्यानमारा बन्दुक । धार्चुलातिर फर्केका तिनका बन्दुकहरु मानौँ ‘ठोकिदिऊँ कि’ को दाउमा छन् । आखिर ठोक्ने कसलाई हो ? यस्तो लाग्छ मानौँ सीमान्त क्षेत्रमा वारि र पारिको युद्ध छेडिएको छ । र, नेपाली सशस्त्र प्रहरी आफ्नो भूभागको रक्षा गर्न रणभूमिमा कटिबद्ध छ । यसो सुन्दा यो वृत्तान्त बडो रुमानी, रोचक र साहसिक लाग्छ । र, मनमा कताकता आश जागेर आउँछ, सिंहदरबारको जङ्गी आदेशमा हाम्रा वीर गोर्खालीहरुले कालापानी र लिपुलेकै पो फर्काउने हुन् कि ?
